Servicio

Servicio

 

Koningin Wilhelmina Fonds Aruba ta duna diferente tipo di servicio gratuitamete na e pashent di cancer y su famia:

Prevencion di Cancer

Tin mas cu 100 diferente tipo di cancer y tin cierto factornan di riesgo cu tur hende por tene na cuenta cu nan. Pesey den forma di foyeto, lectura, charla Koningin Wilhelmina Fonds ta purba haci tur hende consciente di esakinan.

Tin material educativo cu por wordo usa na scolnan. Na e Centro di Informacion, situa na Spinozastraat 9 tin buki y video cu por wordo fia. Koningin Wilhelmina Fonds ta conseha tur hende pa busca informacion adicional den caso di cualkier duda o pregunta.

Atraves di su facebook page Koningin Wilhelmina Fonds y awor atraves di su website www.koninginwilhelminafonds.com por haya diferente informacion tocante cancer pero tambe tocante con pa reduci e riesgo di haya y preveni cancer.

Combatimento di Cancer

Ora un persona haya tende cu e tin cancer esaki ta un impacto tanto pa e persona mes como pa su famia. Den un caso asina Koningin Wilhelmina Fonds t’ey pa duna informacion y apoyo. Unda un persona mester bay, kico e mester haci. Si e persona tin interes pa papia cu un pashent of ex-pashent Koningin Wilhelmina Fonds por intermedia. Mayoria bes e persona mester wordo opera – na Aruba of den exterior. Si mester haya quimoterapia esaki ta posible na Aruba mes. Pero pa radioterapia – bestraling – mester bai Corsow of Colombia. Tambe den esaki Koningin Wilhelmina Fonds ta duna informacion, si tin mester por regla transporte di dialuna pa diabierna pa Sint Elisabeth Hospitaal den cooperacion cu Prinses Wilhelmina Fonds na Corsow.

Articulonan di Postmastectomia

For di aña 1982 Koningin Wilhelmina Fonds tin un surtido di articulonan pa uso despues di operacion di pecho (mastectomia of lumpectomia) manera pecho falso/prothese/protesis/prostesis, brassières special y badpak.

Grupo di Sosten

Tur luna e “praatgroep”, un grupo di persona cu a enfrenta e malesa di cancer, ta reuni pa asina intercambia idea, expresa nan sentimento y mas importante duna apoyo na otro.

Cuido di imahen

Un pashent cu tin di haya chemotherapia hopi biaha ta pasa dor di cambionan manera caida di cabey. Den casonan aki Koningin Wilhelmina Fonds ta cubri pa e pashent por ricibi un peluca pa e pasa dor di e temporada aki sin cu e mester preocupa su mes cu su imahen fisico. Pa Koningin Wilhelmina Fonds ta importante pa e persona sinti su mes comodo no obstante e periodo di tratamento cu e ta pasando aden. No solamente e pashentnan enfrenta cu cancer di pecho ta ricibi ayudo si no tur pashent cu wordo enfrenta y ta combati cancer. Den caso di prothese Koningin Wilhelmina Fonds ta asisti tambe na momento cu mester di un otro tipo di prothese manera por ehempel nanishi.

Cuido na cas

Cuido na cas ta posibel y cu Koningin Wilhelmina Fonds ta ofrece e servicio aki. Pa solicita pa e servicio aki por pasa na nos oficina of por tuma contacto via telefon. E cuido aki ta pa personanan cu ta den fase terminal di cancer y ta desea pa pasa nan ultimo dianan na cas hunto cu nan famia. Den e caso aki ta asisti e pashent y su famia cu cuido di enfermeranan diploma.

Pa facilita e cuido na cas Koningin Wilhelmina Fonds tin material manera cama, rolstoel, postoel etc. E pashent como tambe e famia ta wordo splica kico por spera di e servicionan di Koningin Wilhelmina fonds. Koningin Wilhelmina Fonds ta conta riba cooperacion di e famia na tur momento.

E enfermeronan no ta asisti solamente e pashent den e cuido pero tambe ta duna asistencia na e famia y amistadnan den e periodo di cuido na cas.

Pa tur informacion adicional por pasa cerca nos di Koningin Wilhelmina Fonds durante oranan di oficina. Yama libremente pa haci un cita si bo ta desea di pasa un otro ora.

Transporte

Un pashent cu tin di acudi na Hospital of na e departamento di Oncologia pa ricibi su tratamento hopi biaha no tin un famia o amistad pa hibe sea pa haya su tratamento of pa haci su testnan di laboratorio. Ora e pashent caba di ricibi su tratamento mayoria di biaha e ta den un situacion di saludo poco debil y na e momento ey ta importante pa e bai cas pa sosega. Si un pashent no tin transportacion pa yega hospital pa su tratamento of pa regresa su cas despues di tratamento, Koningin Wilhelmina Fonds ta asisti cu transporte di e pashent pa of despues di su tratamento.

Ayudo pa bai den exterior

Na momento cu un pashent mester bai sigi su tratamento den exterior ta importante pa e tin un persona pa compañe. Nunca no por premira con e reaccion ta na momento cu ta ricibi bestraling. Tambe ta importante pa ora un pashent wordo referi den exterior pa e wordo acompaña ya cu hopi biaha e splicacion di e tratamento mester wordo procesa y ta recomendabel semper pa bai cu un otro persona. Na momentonan asina AZV ta aproba pa un persona compaña e pashent cu tin di bai den exterior pa su saludo. Den caso di cancer un tratamento di bestraling mayoria bez ta dura por medio 6 siman y ta dificil pa un persona haya liber 6 siman pa compaña un persona den exterior. Den casonan cu e pashent mester di un yudansa Koningin Wilhelmina Fonds ta asisti den e viahe pa e di dos persona viaha pa exterior y asina pa asisti e pashent den su tratamento.

Orario di e Centro di Informacion ta: Dialuna pa diabierna, di 9:00 am – 12:00 pm

 

 

 

One Comment on “Servicio

  1. Pingback: Koningin Wilhelmina Fonds Aruba cu un rifa cu hopi premio atractivo pa yuda recauda fondo. | Koningin Wilhelmina Fonds

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: