Peso saludabel

Mantene un peso saludabel

Mantene un peso saludabel ta un di e medidanan mas importante cu nos por tuma pa prevencion di cancer. Un peso saludabel ta importante pa yuda preveni malesa cardiovascular y diabetes tipo 2 tambe.

E relacion entre peso y cancer

Peso di mas ta aumenta e posibilidad pa haya 10 diferente sorto di cancer:

Cancer di (den ordo alfabetico):

  1. Esofago
  2. Galblaas
  3. Higra
  4. Matriz
  5. Ovario
  6. Pancreas
  7. Pecho (cerca hende muhe despues di menopausa)
  8. Prostaat (avansa)
  9. Riñon
  10. Tripa

Segun cientificonan tin diferente splicacion pa e relacion entre peso y cancer. Entre otro ta conoci cu peso di mas tin un efecto ariba e nivel di hormona den nos curpa. Tin cierto hormona cu por aumenta e riesgo pa haya cancer. E hormona estrogeno, por ehempel, por hisa e riesgo pa haya cancer di pecho. Estudionan ta mustra cu specialmente vet rond di cintura ta haci nos curpa produci mas hormonanan di crecemento. Esaki tin un efecto ariba e riesgo pa haya cancer.

Celnan di vet por conduci tambe na inflamacion y resistencia contra insulina. E factornan aki tambe tin conexion cu e desaroyo di cancer.

Kico ta un peso saludabel?

Tin dos manera pa midi si bo peso ta saludabel: calcula bo BMI (body mass index, e indice di masa corporal) y midi bo cintura.

Calcula bo BMI:

Calculacion di bo BMI ta un manera facil pa haya sa si bo peso ta saludabel. E indice aki ta calcula bo peso den relacion cu bo haltura. E metodo aki ta util pa mayoria hende cu excepcion di atletanan, hendenan di edad avansa, muhe na estado, mucha y hendenan cu ta mas cortico cu 1.5 meter di haltura.

Pa calcula bo BMI haci lo siguiente:

  1. Pisa bo mes (den kilo).
  2. Midi bo haltura (den meter).
  3. Calcula e kwadraat di bo haltura. Si bo ta 1.7 meter halto, bo ta calcula e kwadraat door di multiplica 1.7 cu 1.7.
  4. Dividi bo peso door di e kwadraat di bo haltura (e solucion di stap 3).

 

Un ehempel: e BMI di un persona cu ta pisa 70 kilo y cu ta 1.7 meter halto ta:

70 / (1.7 x 1.7) =

70 / 2.89 = BMI ta 24.2

 

Si bo BMI ta:

  • Menos di 18.5: bo tin un peso demasiado abou.
  • Entre 18.5 y 24.9: bo tin un peso saludabel.
  • Entre 25 y 29.9: bo tin peso di mas.
  • 30 of mas: bo tin obesitas.

 

Tip:

Bo por haci uzo di un calculator riba e website di Wereld Kanker Onderzoek Fonds pa calcula bo BMI na un manera ainda mas facil y liher: bishita www.wkof.nl/bmi

 

Midi bo cintura:

Na unda e vet di bo curpa ta situa tambe ta hopi importante. Cientificonan a haya sa cu mas tanto vet na cintura ta un riesgo pa nos salud. Midi bo cintura regularmente pa bo keda tira bista riba bo peso. Unico cos cu bo mester ta un cinta pa midi.

Pa midi bo cintura:

  1. Pone e cinta di midi rond di bo cintura, entre bo ribchinan mas abou y e parti ariba di bo weso di heup.
  2. Cera e cinta di midi na bo curpa, pero percura cu esaki no ta mucho preta. E cinta no mester primi bo cuero.
  3. Midi bo cintura despues di exhala rosea.

 

Un midi di cintura saludabel ta en general:

  • Menos di 80 cm cerca hende muhe.
  • Menos di 94 cm cerca hende homber.

Pa hende homber di origen Asiatico un midi saludabel ta menos di 90 cm.

 

Tuma accion

Pa medio di loke nos ta come y bebe nos ta haya caloria, y nos ta kima caloria door di actividad fisico. Ora nos come y bebe mas caloria di loke nos ta kima door di move, nos ta subi di peso. Un alimentacion saludabel y mas movecion ta importante pa yega na, y mantene, un peso saludabel.

Consehonan pa yega na, y mantene, un peso saludabel

  • Tuma e prome stap door di calcula bo BMI y midi bo cintura. Asina aki bo ta na altura di bo peso actual y bo por determina un meta realistico.
  • Scohe pa un alimentacion saludabel cu alimento cu poco caloria. Alimentacion vegetal, por ehempel fruta y berdura, ta contene poco caloria, bon nutricion, fibra y awa pa yudabo sinti stoma yen.
  • Pone atencion riba e porcion di cuminda. Comemento demas di cualke sorto di cuminda por ponebo subi di peso. Haci bo porcionnan mas chikito pa asina bo por controla mas miho cuanto bo ta come.
  • Haci mas movecion. Door di actividad fisico bo ta kima caloria cu di otro manera por wordo warda den bo curpa den forma di vet.
%d bloggers like this: