Move mas

Move mas

Actividad fisico ta reduci e posibilidad pa haya cancer. No solamente ta importante pa nos haci ehercicio regularmente, pero tambe pa limita e cantidad di tempo cu nos ta pasa haciendo actividadnan sinta.

E relacion entre actividad fisico y cancer

Actividad fisico ta yuda proteha nos contra cancer den dos diferente manera: un manera directo y un manera indirecto.

Proteccion directo

Evidencia di estudionan cientifico ta mustra cu actividad fisico ta yuda proteha contra cancer di tripa, pecho (cerca muhe despues di menopausa) y matriz. Actividad fisico por yuda nos mantene un nivel di hormona saludabel. Esaki ta importante pasobra cierto hormona por aumenta e riesgo pa haya cancer.

Proteccion indirecto

Actividad fisico ta yuda nos mantene un peso saludabel. Door di move nos ta kima caloria. Si nos curpa haya mas caloria pa medio di loke nos ta come y bebe cu e cantidad di caloria cu nos ta kima door di move, nos ta subi di peso. Debi na esaki mas actividad fisico ta yuda nos mantene un peso saludabel. Esaki ta hopi importante pasobra peso di mas ta un factor di riesgo pa haya cancer.

 

Kico ta actividad fisico?

Actividad fisico ta encera tur sorto di actividad cu ta ponebo move. No necesariamente bo mester bay un gym of practica un deporte. Tin hopi diferente manera di move cu ta facil, cu bo por pas den bo rutina diario, y cu no ta costa hopi placa. Por ehempel cana, core, landa, of core bicicleta. Hasta haci cas of cura limpi ta conta si esaki pone bo curason bati mas liher y ponebo hala rosea mas liher.

Cada sorto di actividad fisico ta bon, pero tin diferencia den intensidad. Ta bon pa varia den intensidad di actividad fisico.

 

Haci ehercicio regularmente

Ta consehabel pa haci ehercicio por lo menos 30 minuut cada dia. No ta necesario pa haci esaki 30 minuut largo tras di otro, bo por parti esaki durante di dia tambe. Por ehempel bo por haci gymnastiek 10 minuut mainta na cas prome cu bo bay trabou, y atardi bo por cana of core den park of banda di lama 20 minuut.

 

Si bo no ta custumbra na haci ehercicio corda cu algo ta miho cu nada. Cuminsa poco poco te ora bo logra haci esaki durante 30 minuut. Si 30 minuut ta logra sin dificultad, subi esaki te na 60 minuut of scohe pa un tipo di ehercicio cu un intensidad mas halto.

 

Limita actividadnan sinta

Hopi di nos ta pasa demasiado tempo haciendo actividadnan sinta cu no ta pone nos move suficiente. Por ehempel wak television of traha tras di computer. Cambia bo custumbernan y scohe pa actividadnan cu ta ponebo move mas. Por ehempel, bo por scohe pa core tur atardi den grupo cu famia of conocirnan, esaki ta motivabo tambe pa mantene e rutina aki. Cambionan chikito por haci un diferencia grandi: scohe pa trapi en bes di lift, cana mas en bes di bay den auto, of parkeer bo auto mas leu for di unda bo mester ta en bes di dilanti di e entrada. Na trabou tambe bo por move mas. Por ehempel, si bo ta traha den oficina, cana bay cerca un colega en bes di manda e-mail of uza telefoon.

 

Consehonan pa move mas

  • Haci 30 minuut di ehercicio parti di bo rutina diario. Planea esaki manera un afspraak den bo agenda y traha tempo pa esaki.
  • Determina un meta realistico pa bo mes. Si actualmente bo no to haci ehercicio regularmente, no spera cu di un dia pa otro bo lo bira un atleta. Cuminsa cu stapnan chikito, y mehora bo condicion poco poco. Di e manera aki e chens ta mas grandi cu lo bo mantene bo motivacion pa haci ehercicio.

 

 

 

%d bloggers like this: