Despues di cancer

Despues di cancer

cancer_survivor_wristband

Consehonan pa sobreviviente di cancer

Estudio cientifico ta mustra cu un estilo di bida saludabel ta hopi importante no solamente pa prevencion di cancer, pero pa sobreviviente di cancer tambe.

E siguiente informacion ta pa personanan cu a caba cu e tratamento contra cancer y cu a recupera di esaki. Si bo no ta sigur cu bo ta den e fase aki, consulta esaki cu bo dokter.

Biba saludabel despues di cancer

Despues di caba cu e tratamento contra cancer bo lo ta sinti un alivio. Pero e tratamento hopi biaha tin un impacto fisico y mental grandi. Despues di a recupera di e malesa y tratamento bo por sinti preocupacion tocante bolbe haya cancer. Ta hopi importante pa bo tuma rienda atrobe di bo salud. Cierto factor no ta den bo man, pero bo alimentacion y estilo di bida si.

E miho conseho pa sobreviviente di cancer

A base di resultadonan di estudionan cientifico actual, e miho conseho pa bo como sobreviviente di cancer ta pa sigui e recomendacionnan pa prevencion di cancer, a menos cu bo dokter consehabo algo otro. Door di sigui e recomendacionnan bo ta reduci e posibilidad pa bolbe haya cancer. E recomendacionnan aki por yudabo reduci e posibilidad pa haya otro malesa tambe, manera malesa di curason y diabetes.

Investigacion cientifico despues di cancer

Mas y mas estudio cientifico ta mustra cu come saludabel, ehercicio regular y un peso saludabel ta yuda sobreviviente di cancer preveni pa haya cancer atrobe. Mayoria di estudionan ta mustra esaki cerca sobreviviente di cancer di pecho. Tambe ta saliendo na cla cu un estilo di bida saludabel ta aumenta e posibilidad di sobrevivencia di e pashent di cancer di pecho. Pero falta hopi mas estudio ainda.

Investigacion cientifico tocante e relacion entre nutricion, estilo di bida y sobrevivencia di cancer ta un area di estudio nobo y compleho. Wereld Kanker Onderzoek Fonds, e fundacion na Hulanda cu ta coopera cu KWF Aruba, ta haya hopi importante pa haci mas investigacion y sondeo pa haya sa mas tocante sobrevivencia di cancer. Di e manera aki nos lo por yudabo cu mas conseho den futuro.

Nutricion y estilo di bida durante cancer

Si recientemente bo a wordo diagnostica cu cancer, of si actualmente ainda bo ta bou tratamento, bo lo por tin necesidadnan special den e area di nutricion. Si esaki ta bo caso ta importante pa bo pidi bo dokter of un dietista specialisa pa conseho. Esaki ta conta tambe ora cu door di consecuencia di e tratamento bo tin dificultad pa come of digeri cierto alimento.

%d bloggers like this: