Colaboracion

KWF Aruba y Wereld Kanker Onderzoek Fonds ta uni forsa pa prevencion di cancer na Aruba

Prevencion di cancer pa medio di nos estilo di bida ta un area di estudio cientifico compleho. Awendia tin hopi informacion tocante alimentacion y salud, specialmente riba internet. Hopi biaha e informacionnan aki no tin un bon base cientifico, y nan por confundi nos mas cu nan ta yuda.

Pa nos campaña di prevencion di cancer KWF Aruba ta coopera cu fundacion Wereld Kanker Onderzoek Fonds, e autoridad den e area di prevencion di cancer. Wereld Kanker Onderzoek Fonds, estableci desde 1994 na Amsterdam, Hulanda, ta sondea continuamente e relacion entre cuminda, nutricion, actividad fisico, peso y e posibilidad pa haya cancer. A base di analisis di miles di estudio, y den cooperacion cu expertonan rond mundo, Wereld Kanker Onderzoek Fonds a formula 10 recomendacion pa yudabo reduci e posibilidad pa haya cancer. E ekipo di cientifico ta formula recomendacion y conseho solamente si e base cientifico ta solido suficiente pa por haci esaki, pa asina e publico por confia den e informacion.

Wereld Kanker Onderzoek Fonds ta forma parti di e red internacional World Cancer Research Fund Global Network, cu tin miembronan na Merca, Inglatera, Hulanda, y Hong Kong.

Den colaboracion cu otro, KWF Aruba y Wereld Kanker Onderzoek Fonds ta traduci e resultadonan di estudionan cientifico den informacion practico pa asina yuda e publico di Aruba pa reduci e posibilidad pa haya cancer. Den esaki nos ta traha estrechamente cu Germund Daal, Hoofd Communicatie en Gezondheidsvoorlichting y vocero di Wereld Kanker Onderzoek Fonds.

WKOF-Germond
Germund Daal, Hoofd Communicatie en Gezondheidsvoorlichting y Vocero di Wereld Kanker Onderzoek Fonds.

“Como Arubiano ta un privilegio y mi responsabilidad pa por comparti e descubrimentonan cientifico tocante prevencion di cancer cu KWF Aruba, pa di e forma aki hunto yuda haci un diferencia na Aruba. Ta un placer pa por colabora cu e team dedica di KWF Aruba, cu dia den dia afo ta haci un trabou bunita y ehemplar pa Aruba. Mi conoce e impacto di cancer di cerca, y mi meta ta pa yuda proteha otro contra e malesa aki.”

 

 

%d bloggers like this: