Koningin Wilhelmina Fonds Aruba cu tayer ‘Siña traha un plato saludabel’

 

Diasabra 7 di november Koningin Wilhelmina Fonds Aruba ta sera nan campaña di concientisacion “Ban Preveni Cancer Hunto” cu un merdia saludabel na Superfood, unda cu bo por siña con pa prepara un plato saludabel. Despues di un charla informativo di nutricionista Saskia Budel, participantenan lo haya e oportunidad pa disfruta di un dushi plato di cuminda saludabel. Maria Petit, kende ta un celebridad den e mundo culinario, lo haci un demostracion con pa bo traha un plato dushi y alabes saludabel cu ingredientenan cu bo lo por haya den Superfood mes.

Cuponan ta limita pa e merdia informativo aki. Si bo kier registra pa participa na tayer aki, bo por yama Koningin Wilhelmina Fonds na 5820412 of 5929339. E tayer ta cuminsa pa 11or y ta tuma lugar na e di dos piso di Superfood den e foodcourt banda di CASA. Participacion ta gratis. Despues di disfruta di bo plato, lo bo haya e receta exclusivo di Maria Petit pa bo mes try out na cas y asina prepara un dushi plato saludabel pa famia y amistadnan.

Prevencion ta hopi importante den e lucha contra cancer. Expertonan ta calcula cu mas of menos un tercera parti di e casonan di cancer mas comun na paisnan occidental por wordo preveni door di come saludabel, moveshon regular y un peso saludabel.

%d bloggers like this: