Consumo di hopi carni cora of carni procesa por causa cancer di tripa

 

Desde comienso di e siman aki World Health Organisation ta reconoce cu carni cora y carni procesa por causa cancer den nos curpa. Limita comemento di carni cora, y evita di come carni procesa. Ora nos come hopi carni cora, y carni procesa, nos tin mas posibilidad pa haya cancer. Esaki ta conclusion di un investigacion mundial cu e organisacion a haci y cu a proba cu tin un relacion entre consumo di carni cora y carni procesa y cancer.

Kico ta carni cora, y kico ta carni procesa?

Carni cora ta entre otro: carni di baca, porco, carne, y cabrito. Cu carni cora nos no kiermen carni manera steak cu no a wordo cushina ful bon. Cu carni cora nos kiermen tur sorto di carni cu di naturalesa tin un color cora.

Carni procesa ta carni cu a wordo conserva door di a wordo huma, seca, of pa medio di salo of substancianan di conservacion. Carni procesa ta por ehempel: ham, bacon, salami, hot dog, y rookworst.

Hamburger y carni mula ta wordo considera carni procesa solamente si nan a wordo conserva cu salo of substancianan kimico (cu esaki nos no kiermen e salo cu nos mes ta añadi ora di cushina, pero salo cu a wordo usa pa conserva e carni pa asina e wanta mas tempo).

 

E relacion entre carni cora, carni procesa y cancer

A keda cientificamente demostra cu comemento di hopi carni cora por causa cancer di tripa. Un posibel splicacion pa e relacion aki ta cu e heemijzer, un sorto di hero cu ta duna carni cora su color, por causa daño na tripa. Estudionan ta mustra tambe cu hende cu ta come hopi carni cora mayoria bes ta come poco alimento vegetal. Asina nan no ta probecha di e beneficionan di alimento vegetal ora ta trata di prevencion di cancer.

Estudionan cientifico ta mustra cu comemento di carni procesa tambe por causa cancer di tripa. Ora cu carni wordo conserva door di wordo huma, seca of pa medio di salo of substancianan di conservacion, esaki por conduci na e formacion di substancianan carcinogenico. E substancianan aki por causa daño den nos curpa y asina causa cancer.

 

E recomendacion tocante carni cora

Carni cora ta contene substancia di nutricion saludabel manera proteina, hero y zink. Carni cora ta forma parti di un patrono di alimentacion saludabel. Pero nos no tin mester di come carni cora tur dia. Limita comemento di carni cora te no mas di 500 gram (peso despues di preparacion, e peso di carni curu ta mas of menos 700-750 gram) pa siman. Estudionan ta mustra cu bou di e limite di 500 gram pa siman nos riesgo pa haya cancer di tripa no ta wordo afecta di manera importante. Pero comemento regularmente di mas di 500 gram pa siman si ta hisa e riesgo aki.

 

E recomendacion tocante carni procesa

Ta consehabel pa evita di come carni procesa. Ora ta trata di carni procesa cientificonan no a identifica un cantidad di consumo cu no ta hisa e riesgo pa haya cancer di tripa. Si bo kier come carni, scohe pa e sorto no procesa, pues carni cora (carni fresco).

 

Consehonan pa come menos carni:

  • Come un paar di biaha pa siman galiña of pisca en bes di carni. Na Aruba nos tin e bendicion di por come hopi sorto di pisca fresco.
  • Purba tambe pa reemplasa carni den un receta cu otro alimento. Por ehempel, reemplasa carni mula den bo saus di spaghetti cu pisca, berdura of legumbre. Tambe bo por cushina e receta cu mita di e cantidad di carni y añadi mas berdura of legumbre.
  • Reemplasa carni procesa cu alternativanan mas saludabel. Scohe pa traha bo sandwich cu galiña, keeshi (cu menos vet) of pisca (por ehempel tuna) en bes di ham, salami of worst.

Pa mas informacion bishita nos FaceBook Koningin Wilhelmina Fonds Aruba of bo por bishita nos Centro di Informacion situa den Spinozastraat 9, net patras di Watertoren na Playa of bel nos na 5820412.

%d bloggers like this: