Sinta dimas ta aumenta e posibilidad pa haya cancer serca muhernan

 

Sinta dimas ta aumenta e posibilidad pa haya cancer serca muhernan
Scientificonan di e American Cancer Society a descubri cu muhernan cu ta pasa mas cu 6 ora pa dia di nan tempo liber sinta, tin 10% mas chens di haya cancer cu muhernan cu ta sinta menos cu 3 ora pa dia den nan tempo liber. E muhernan aki tabatin mas posibilidad tambe di desaroya cierto tiponan di cancer manera multiple melanoma, cancer di ovario y cancer di pecho. Pa e mayoria di hende homber estudionan a mustra cu sinta hopi no ta aumenta nan posibilidad di haya cancer.
E estudio aki a wordo realisa bou di 77.462 muher y 69.260 homber registra na e American Cancer Society. Serca e muhernan e estudio a dura un averahe di 15.8 aña y serca e hombernan e estudio a dura un averahe di 13.2 aña. E scientificonan a compara cuanto ora e personanan a pasa sinta den nan tempo liber cu e risico di desaroya cancer. Niun di e participantenan tabatin cancer ora cu a cuminsa cu e estudio.
Entre 1992 y 2009 como 12.236 muher y 18.555 homber a wordo diagnostica cu cancer. Serca muhernan a bin dilanti cu muhernan cu sinta 6 ora of mas pa dia durante nan tempo liber ta gelink cu un posibilidad di 65% mas chens pa haya multiple melanoma, 43% mas chens pa haya cancer di ovario, 10% mas chens pa haya cancer di pecho y 10% mas chens pa haya cualkier tipo di cancer compara cu muhernan cu ta sinta 3 ora of menos pa dia durante nan ora liber.
E posibilidad pa aumento serca e muhernan a keda mescos despues cu a ahusta e cantidad di actividad fisico, BMI, edad y otro factornan. Pa hende homber si tabatin diferencia: sinta dimas ta aumenta e posibilidad pa haya cancer solamente serca hombernan obeso.
Estudionan anterior a mustra un link entre e cantidad di tempo cu un hende ta pasa sinta y edad hoben di fayece, asta pa esnan cu tin mas actividad fisico. E American Cancer Society ta recomenda adultonan pa tin sikiera 150 minuut di ehercicio modera of 75 minuut di ehercicio intenso pa siman, preferiblemente parti over di henter e siman y tambe ta conseha pa sinta lo menos posibel.
Consehonan facil pa minimalisa e tempo sinta ta por ehempel:
Na cas:

wak television para mientras cu bo ta dobla bo pañanan
Na trabou:

Parkeer mas leu posibel di bo destinacion ya asina bo ta cana mas
Keda para durante cu bo tin conference calls
Keda para durante reunionan cortico
Lanta cana cada ora pa sikiera un of dos minuut
Den cuadro di nos campaña di prevencion ‘Ban preveni Cancer Hunto’, Koningin Wilhelmina Fonds Aruba ta enfoca riba tres punto cu ta yuda un persona reduci e posbilidad pa haya cancer: Mantene un peso saludabel, Moveshon regular y Come Saludabel. Si bo kier mas informacion, por pasa libremente na nos Centro di Informacion na Spinozastraat 9, net patras di Watertoren na Playa of por bishita nos FaceBook Koningin Wilhelmina Fonds Aruba.

 

%d bloggers like this: